‘રોશેશ સારાભાઈ’એ છોડી દીધી એક્ટિંગ, હવે કરે છે ખેતી

Please log in or register to like posts.
News

આધ્યાત્મિક ખેતી કરે છે ‘રોશેશ’

કુનાલ ગુહા: ઉબડ-ખાબડ રસ્તા પટણાથી 125 કિમી દૂર આવેલા ગયામાં આવેલા બર્મામાં લઈ ગયા જ્યાં રોશેશ સારાભાઈ (TV શો સારાભાઈ VS સારાભાઈ) તરીકે જાણીતા એક્ટર રાજેશ કુમાર છેલ્લા છ મહિનાથી છે. બર્મા કે જ્યાં ઝાડપાન નાશ પામ્યા છે અને જેથી ગામ ગરમીથી તપી રહ્યું છે. આ ગામને ‘સ્માર્ટ’ બનાવવા માટે રાજેશ કુમાર સખત પ્રયાસ કરી રહ્યા છે. રાજેશના નેતૃત્વ હેઠળ બર્માએ ‘ઝીરો બજેટ સ્પીરીચ્યુઅલ ફાર્મિંગ’ મતલબ કે, એવી ફિલોસોફી અપનાવી છે જેમાં કેમિકલવાળી વસ્તુઓને બદલે ફક્ત ઓર્ગેનિક ઉત્પાદનો વાપરવા.

રાજેશના પ્રયાસોથી વીજળી આવી

42 વર્ષીય એક્ટર રાજેશ કુમાર જે બિહારના બર્માના જ છે તેમણે પોતાની 20 વર્ષની એક્ટિંગ કરિયરને ઓછામાં ઓછા છ મહિનાથી તો આ કામ માટે છોડી જ દીધી છે. બર્મા ગામમાં ઈંટોથી ચણેલા મકાન છે, અહીંના મકાનોમાં ગત મહિને જ વીજળી પહોંચી છે. રાજેશના વીજળી વિભાગ સાથેના સતત સંપર્ક અને પ્રયાસો બાદ ગામને વીજળી મળી છે.

FPO શરૂ કરવા કાર્યરત

છેલ્લા બે મહિનાથી રાજેશ તેના 10 એકર ખેતરની જમીનને ચકાસી રહ્યા છે. કેટલાક ઉત્પાદનો માટે હવામાન અનુકૂળ છે કે નહીં તેની ચકાસણી, ઓર્ગેનિક ફાર્મિંગ અંગેનું રિસર્ચ પણ કર્યું. અને હવે રાજેશ સ્થાનિક ખેડૂતો સાથે મળીને ફાર્મર પ્રોડ્યુસર ઓર્ગેનાઈઝેશન (FPO)શરૂ કરવાના પ્રયાસમાં છે.

‘બુદ્ધની જેમ થયું આત્મજ્ઞાન’

રાજેશે કહ્યું કે, ”સપ્ટેમ્બર મહિનામાં મારા કરિયરમાંથી બ્રેક લઈને મને આ તરફ વળવાનો વિચાર આવ્યો. જ્યારે હું અહીં જ ક્યાંક એક આંબાના ઝાડ નીચે બેઠો હતો ત્યારે મને ઓર્ગેનિક ફાર્મિંગનો વિચાર આવ્યો, ભગવાન બુદ્ધની જેમ જ. જ્યારે ગયા વર્ષે મેં બર્માની મુલાકાત લીધી ત્યારે મારા પિતાએ અમારી વારસાગત જમીન તે જ્યાં કંઈ ઉગતું ન હતું ત્યાં વિવિધ પ્રકારના શાકભાજી, ફળો અને પાક ઉગાડ્યા હતા. એ પણ ફક્ત પાંચ વર્ષમાં અને કોઈપણ જાતના કેમિકલવાળી દવા કે ખાતરનો ઉપયોગ કર્યા વિના. આ જોઈને હું આશ્ચર્યમાં પડ્યો હતો.”

કોલેજના મિત્રથી મળી પ્રેરણા

રાજેશ કહ્યું કે, ”તેમના પિતાએ તેમને ઘણીવાર તેમની ખેતીલાયક જમીન પર કંઈક કરવાની વિનંતી કરી હતી. મેં UNના એક સ્ટડીમાં વાંચ્યું હતું કે ભારતમાં ક્લાઈમેટ ચેન્જના કારણે કેટલીક જમીનો ઉજ્જડ થઈ જશે. 17 વર્ષથી સ્વાસ્થ્યના ક્ષેત્રમાં કામ કરતાં મારા કોલેજના મિત્ર નિત્યાનંદ દીપક વિશે જાણવા મળ્યું. છેલ્લા 3 વર્ષથી દીપક બિહારમાં જ તેના ગામમાં ઓર્ગેનિક ફાર્મિંગ કરે છે અને 100 ખેડૂતોને પણ તેણે આમ કરવા પ્રેર્યા છે, ત્યારે મેં આધ્યાત્મિક ખેતી કરવાનું વિચાર્યું. જો કે આ બદલાવ રાતોરાત શક્ય નથી.”

કેવી રીતે થાય છે આધ્યાત્મિક ખેેતી?

રાજેશ કહે છે કે, ”આધ્યાત્મિક ખેતી માટે ખેતરની જમીન ઓર્ગેનિક ત્યારે જ ગણાય જ્યારે ત્રણ વર્ષ જેટલા સમયથી તેમાં કેમિકલવાળા પદાર્થો ન વપરાયા હોય. જો તમારા પાડોશના ખેતરમાં પાક માટે કેમિકલનો ઉપયોગ થતો હોય અને તેવું પાણી જો તમારા પોતાના ખેતરમાં આવે તો તે બધું જ બરબાદ કરી નાખે છે.”

રાજેશની ઓર્ગેનિક કેરી આવશે માર્કેટમાં

અમારા સહયોગી મિરરના રિપોર્ટર ઘઉંના ખેતરો પાસેથી પસાર થતાં હતા ત્યારે રાજેશે તેમની આગળની યોજનાઓ વિશે જણાવ્યું. રાજેશે આંબાના ઝાડ પર લટકતી કેરીઓ તરફ ઈશારો કરતાં કહ્યું કે, ”આ કેરીઓને પેક કરીને કેમિકલ ફ્રી કેરી તરીકે વેચવામાં આવશે. ઓર્ગેનિક કેરીઓની પ્રથમ બેચ આ જૂનમાં માર્કેટમાં મળશે.”

પિતાએ પુત્રના વિચાર અંગે કહ્યું

રાજેશના 71 વર્ષીય પિતા શિવાનંદ પ્રસાદ સિંહે કહ્યું કે, ”પર્યાવરણ પ્રત્યે મારો દીકરો ગયા વર્ષે જાગૃત થયો. ગયા વર્ષે જ્યારે તેણે રેલી ફોર રિવર કેમ્પેઈનની કેટલીક ઈવેંટ હોસ્ટ કરી ત્યારે તેને થયું કે જે નદીઓ એક સમયે આપણા ખેતરો પાસેથી વહેતી હતી તે હવે સૂકાવા લાગી છે.”

જેવું ખાઈશું તેવા બનીશું: રાજેશ

રાજેશે કહ્યું કે, “આપણે જેવું ખાઈશું એવા બનીશું. થોડા વખત પહેલા જ્યારે મારા ગામના લોકો કોઈ ખેતરો પાસેથી પસાર થતાં ત્યારે તેમને ‘Whoosh’ અવાજ સાંભળવા મળતો. થોડા દિવસ બાદ તપાસ કરતાં અમને જાણ થઈ કે આ અવાજ દૂધી ઉગાડવા માટે કરાય છે. દૂધીનો છોડ જલ્દી ઉગે તે માટે તેમાં કેમિકલનું ઈંજેક્શન આપવામાં આવતું હતું. કેમિકલથી દૂધી ફૂલી જતી અને રાત્રે મોટી થતી જેના કારણે આ પ્રકારના અવાજો આવતા.”

ખેડૂતો ભણેલાં નથી પણ જ્ઞાન છે

રાજેશ પછી ટામેટાંના ખેતરમાં લઈને પહોંચ્યા. જ્યાં લાલ-લીલા ટામેટાં જમીન પર પડ્યા હતા. રાજેશ કહ્યું કે, ”અહીં મને દરરોજ કશુંક નવું શીખવા મળે છે. મારા ગામના ખેડૂતો ભલે બહુ ભણેલા નથી, પણ ખેડે જમીન કેટલી ભેજવાળી છે તે કોઈપણ મશીનની મદદ વિના કહી શકે છે.”

જીવનમાં આવ્યો બદલાવ


રાજેશનું જીવન હવે બદલાઈ ગયું છે. પહેલા તેનો દિવસ ગોરેગાંવથી નાએગાંવ સુધી શૂટિંગ માટે સેટ પર જવા-આવવામાં પસાર થતો હતો. રાજેશ કહે છે કે, “એક દિવસ મને થયું કે નાએગાંવ જવાને બદલે હું મારા ગામ જઉં. હવે મારા દિવસની શરૂઆત ગાયનું દૂધ કાઢવાથી થાય છે. અને પછી હું મારા ખેતરોની મુલાકાતે જઉં છું. ગયા વર્ષે ઓક્ટોબરમાં મારા દીકરાઓ અહાન (9 વર્ષ) અને વ્યાન (6 વર્ષ) મને મળવા આવ્યા ત્યારે તેમણે આંબાના બી વાવ્યા હતા. હવે તેઓ છોડ કેટલો થયો તે જાણવા માટે ફોટા મંગાવે છે.”

બાળકોએ કહ્યું, ખેડૂત તો ગરીબ હોય છે

જ્યારે પહેલીવાર મેં મારા બાળકોને મારા ખેડૂત બનવા અંગે જણાવ્યું તો તેમણે કહ્યું કે ખેડૂત તો ગરીબ હોય છે. અને મારે તેમનો આ જ ખ્યાલ બદલવો છે. જો ખેડૂતો સ્પીરીચ્યુઅલ ફાર્મિંગ કરે તો પાંચ વર્ષમાં જ તેઓ તેમની આવકના 40 ટકા વધુ કમાઈ શકે છે. તો પછી તેમણે વોચમેન અને ડ્રાઈવરની નોકરી કરવા શહેરોમાં નહીં જવું પડે, તેમ મુંબઈમાં પોતાના પરિવારને મૂકીને ખેતી કરવા આવેલા રાજેશે કહ્યું.

પત્નીના સહકાર વિના શક્ય નહોતું

પોતાના આ વિચારમાં સાથ આપવા બદલ રાજેશે પત્ની માધવીનો આભાર માનતા કહ્યું કે, “જ્યારે કોઈ એક્ટર બીજા વ્યવસાયમાં જોડાય છે ત્યારે લોકો વિચારે છે કે તેની પાસે કામ નહીં હોય એટલે આમ કરે છે. પણ મારા કેસમાં એવું બિલકુલ નહોતું. મને ટીવી પર સારું કામ મળતું હતું, અને રોશેશ સારાભાઈ જેવા કેટલાક પાત્રો તો યાદગાર પણ બન્યા છે.”

ખેડૂતોને આધ્યાત્મિક ખેતીનું આપે છે જ્ઞાન

રાજેશ અને તેના પિતાએ ગામમાં ખેડૂતોને આધ્યાત્મિક ખેતીનું જ્ઞાન આપવા માટે બેઠકનું આયોજન કર્યું હતું. રાજેશે બેઠકની શરૂઆત ‘જીવામૃત’ની રેસિપી શેર કરતા કરી. જીવામૃતએ જમીનમાં બી નાખવાના એક દિવસ પહેલા જમીનમાં નંખાતું એક કુદરતી પદાર્થ છે. ગાયના મળ-મૂત્ર, ગોળ, ચણાનો લોટ, પીપળાના ઝાડ નીચેની જમીન અને પાણીના મિશ્રણથી જીવામૃત તૈયાર થાય છે. આ તમામ વસ્તુઓને એક ટેંકમાં 7 દિવસ માટે રાખવામાં આવે છે, જેને રોજ હલાવવી જરૂરી છે. જીવામૃતએ ઝીરો બજેટ સ્પીરીચ્યુઅલ ફાર્મિંગનો અભિન્ન અંગ છે.

પદ્મશ્રી ખેતી નિષ્ણાંતે વિકસાવી પદ્ધતિ

ખેતીની આ પદ્ધતિ વિદર્ભના બેલોરાના 66 વર્ષના ખેતી નિષ્ણાંત પદ્મશ્રી સુભાષ પાલેકરે વિકસાવી છે. પાલેકરે પ્રાચીન સમયમાં કરાતી ખેતીની પદ્ધતિઓના ઉપયોગથી જીવામૃતની શોધ કરી. જીવામૃત દ્વારા જમીનને નવું જીવન આપી પોષણક્ષમ બનાવાય છે.

દરેક પ્રકારના પાક બિહારમાં ઉગી શકે છે

ઓર્ગેનિક ખેતીના ફાયદા અને તેનાથી ઉત્પાદિત પાકને કેવી રીતે માર્કેટમાં વેચી શકાય તેની સમજ આપતાં રાજેશ કહે છે કે, “મોટાભાગના ખેડૂતો દરવર્ષે એકનો એક પાક લે છે. પણ અહીંની જમીન અને આબોહવા મશરૂમથી માંડીને સ્ટ્રોબેરી સુધીના પાકના ઉગાડી શકાય તે પ્રકારની છે. આ પાક ઉગાડવા માટે તમારે ફક્ત માર્ગદર્શન અને કંઈક નવું કરવાની ઈચ્છાની જરૂર છે. જેમકે સૌથી વધુ પપૈયા પંજાબમાં પાકે છે પરંતુ અહીં બિહારમાં પપૈયા ઉગી શકે તેવી સાનુકૂળ પરિસ્થિતિ છે, જો આપણે યોગ્ય બી વાપરીએ તો.”

”ઈંડસ્ટ્રીમાંથી વારંવાર ફોન આવે છે”

રાજેશે પોષણક્ષમ ભાવ મેળવવા પેકિંગ અંગે માર્ગદર્શન આપીને બેઠક પૂર્ણ કરી. ત્યાં જ અચાનક રાજેશનો ફોન વાગ્યો પણ તેણે ન ઉપાડ્યો. રાજેશે રહ્યું કે, “જ્યારે તમે મુંબઈમાં હોવ ત્યારે તમને તમારું ગામ બોલાવે છે અને ગામમાં હોવ ત્યારે ઈંડસ્ટ્રી બોલાવે છે. ખેતી તમને ધીમા પડવાનું શીખવાડે છે, ખાસ કરીને ત્યારે જ્યારે તમે એક એવી ઈંડસ્ટ્રીમાં હોવ જ્યાં તમારે સતત કલાકો સુધી કામ કરવાનું હોય. જીવનમાં એક પડાવ પછી સ્થિરતા આવી જાય છે, પણ તે વર્ણવી ન શકાય તેવી શાંત હોય છે અને અંતે તમે પોતાનો અવાજ સાંભળી શકો છો.”

તમે આ લેખ “JO BAKA” ના સહયોગ થી વાંચી રહ્યા છો. આર્ટિકલ વાંચવા બદલ આભાર

7 લાખ ગુજરાતીને ગમ્યું છે આ પેઈજ..!! શું તમે આપણું ફેસબુક પેઈજ હજુ નથી લાઈક કર્યું ?

દોસ્તો, આર્ટિકલ વાંચીને મજા પડી ને? બસ એવું જ કઈંક નવું જાણવાં માટે અમને સપોર્ટ કરતા રહો અને આર્ટિકલ વધુમાં વધુ શેર કરો

Source: IamGujarat

Advertisements

Comments

comments

Reactions

0
0
0
0
0
0
Already reacted for this post.